અમિતાભ બચ્ચન અને રજનીકાંત બંને ભારતીય સિનેમાના બે પીઢ અભિનેતા છે. બંનેએ ઘણી ફિલ્મોમાં કામ કર્યું છે અને જ્યારે પણ બંને સ્ક્રીન પર આવે છે ત્યારે ફેન્સ તેમને ખૂબ પસંદ કરે છે. હવે આ બંને કલાકારો 33 વર્ષ પછી એક ફિલ્મમાં સાથે કામ કરી રહ્યા છે. બંને થલાઈવર 170 નામની ફિલ્મમાં જોવા મળશે. થોડા સમય પહેલા ટ્વિટર પર અમિતાભ સાથેની એક તસવીર શેયર કરતી વખતે, રજનીકાંતે કહ્યું હતું કે તેઓ વર્ષો પછી ફરીથી બિગ બી સાથે કામ કરીને ખૂબ ખુશ છે. હવે આ બંનેની ફિલ્મને લઈને એક મોટું અપડેટ સામે આવ્યું છે.. Lyca પ્રોડક્શને ઇન્સ્ટાગ્રામ પર અમિતાભ બચ્ચન અને રજનીકાંતની એક તસવીર શેયર કરી છે. બિગ બી ફોનનો ઉપયોગ કરતા જોવા મળે છે અને રજનીકાંત ખભા પર હાથ રાખીને ફોન તરફ જોતા જોવા મળે છે. આ બંનેની તસવીર ખૂબ જ સુંદર છે જે હાલ સોશિયલ મીડિયા પર વાયરલ થઈ છે અને ચાહકો તેને ખૂબ પસંદ કરી રહ્યા છે. ફોટો શેયર કરતા જણાવવામાં આવ્યું હતું કે મુંબઈ શેડ્યૂલનું શૂટિંગ પૂર્ણ થઈ ગયું છે. પ્રોડક્શન હાઉસે લખ્યું, “જ્યારે સુપરસ્ટાર શહેનશાહને થલાઈવર 170ના સેટ પર મળ્યા હતા. 33 વર્ષ પછી રિયુનિયન. આ ફિલ્મમાં અનુભવીનો ડબલ ડોઝ જોવા મળશે.” રિપોર્ટ્સનું માનીએ તો એવું કહેવામાં આવી રહ્યું છે કે આ ફિલ્મ આવતા વર્ષે સિનેમાઘરોમાં રિલીઝ થઈ શકે છે.. તમને જણાવી દઈએ કે, બંને છેલ્લે ફિલ્મ ‘હમ’માં સાથે જોવા મળ્યા હતા. આ ફિલ્મ વર્ષ 1991માં રિલીઝ થઈ હતી. તેનું નિર્દેશન મુકુલ એસ આનંદે કર્યું હતું. આ ફિલ્મમાં બિગ બી અને રજનીકાંત સાથે ગોવિંદા પણ જોવા મળ્યો હતો. કહેવાય છે કે લોકોને આ ફિલ્મ ઘણી પસંદ આવી હતી અને તેણે બોક્સ ઓફિસ પર 9.25 કરોડ રૂપિયાની કમાણી કરી હતી.
